د صنعت او سوداګرۍ سرپرست وزیر په مشرۍ پلاوي سپین بولدک کې د کډوالو وضعیت له نږدې ولید
پنج شنبه مورخ ۹ جمادی الاول ۱۴۴۵ / ۲ لیندی ۱۴۰۲
د صنعت او سوداګرۍ وزرات د سرپرست وزیر الحاج نورالدین عزیزي په مشرۍ پلاوي چې پکې د دې وزارت مرستیال مولوي قدرت الله جمال او د راستنېدونکو سوداګرو لپاره د اسانتیا برابرولو کمېټې غړي هم برخه وال دي، د کندهار په سپین بولدک کې له پاکستانه د راستنېدونکو کډوالو وضعیت له نږدې ولید.
ښاغلي عزیزي له راستنېدونکو کډوالو سره د پوښاک په برخه کې زر کمپلې مرسته وکړه، چې کډوالو ته د مرستو وېشل کېدونکې کمېټې ته وسپارل شوې.
دوی د کډوالو د راستنېدو استقبال، روغتیایي خدمات او د خوراک او پوښاک په برخه کې د بوختو کمېټو هڅې او فعالیتونه له نږدې ولیدل.
یاد پلاوي چې پکې د راستنېدونکو سوداګرو او صنعت کارانو ته د اسانتیا برابرولو کمېټې غړي هم مله دي له پاکستان سره پر کرښه د افغان سوداګرو په تېره بیا د سپین بولدک د سوداګرو د ترانزیت او تجارت اړوند ستونزو د حل ډاډ او بشپړ اطمینان ورکړ.
دې پلاوي کې راستنېدونکو سوداګرو او صنعت کارانو ته د اسانتياوو چمتو کولو کميټې غړو کې د کرنې اوبو لګولو او مالدارۍ وزارت استازی ښاغلی مولوي عبدالظاهر امین او د مهاجرينو او راستنېدونکو چارو وزارت استازی سید مطیع الله خلوتي هم ګډون لري.
