د افغانستان اسلامي امارت د صنعت او سوداګرۍ وزارت معین، مولوي احمدالله زاهد د مل رسمي پلاوي او شاوخوا ٥٠ کسه ملي سوداګرو په ملتیا د بنګلهدېش هېواد ته رسمي سفر وکړ
یکشنبه، 28 رجب المرجب 1447/ 28 جدی 1404
ټاکل شوې ده چې په دې سفر کې به د افغانستان او بنګلهدېش ترمنځ پر دوهاړخیزو تجارتي اړیکو، د سوداګرۍ د پراختیا، د صادراتو او وارداتو د اسانتیاوو، او د ګډو پانګیزو فرصتونو په اړه هر اړخیز بحثونه ترسره شي. همداراز به د دواړو هېوادونو ترمنځ د سوداګریزو همکاریو د پیاوړتیا او د ګډو تفاهمنامو د لاسلیک پر لارو چارو خبرې وشي.
د یاد سفر موخه د افغانستان د ملي سوداګرو لپاره د نوو بازارونو موندل، د افغانستان د تولیداتو لپاره د صادراتي فرصتونو پراخول، او د سیمې په کچه د اقتصادي همکاریو پیاوړتیا بلل کېږي.
د صنعت او سوداګرۍ وزارت ټینګار کوي چې دا ډول سفرونه د هېواد د اقتصادي ودې، د سوداګرۍ د پراختیا او د ملي اقتصاد د پیاوړتیا لپاره مهم او اغېزناک رول لري.
