یو شمېر ایراني صنعتکارانو د سوداګرۍ وزارت له مرستیال سره وکتل
چهار شنبه مورخ ۲۷صفرالمظفر ۱۴۴۵ / ۲۲وږی ۱۴۰۲
له ایران څخه راغلي د صنعتکارانو او سوداګرو پلاوي نن غرمه مهال د صنعت او سوداګرۍ وزارت له مرستیال مولوي قدرت الله جمال سره د نوموړي په کاري دفتر کې وکتل. یاد پلاوی چې مشري یې ښاغلي ساقي کوله په افغانستان کې پانګونې ته لېوالتیا وښوده او د اسلامي امارت لخوا د رامنځته شوې اسانتیاوې یې غوره وبللې.
د وزارت مرستیال د پلاوي د راتګ څخه د مننې تر څنګ زیاته کړه چې د ګاونډي هیوادونو په حیث د افغانستان او ایران سوداګرې اړیکې خورا ارزښتمنې دي او اړینه ده چې پیاوړې شي.
په وینا یې سیاست نه باید په سوداګرۍ منفي اغېز ولري او سوداګریزه راکړه ورکړه تل عادي وساتل شي. ښاغلي جمال د بهرنیو سوداګرو لپاره د پانګه اچونې له رامنځته شوو فرصتونو یادونه هم وکړه.
