په افغانستان کې د علیم خان یسین گیلدیف دنده پای ته ورسیده
شنبه ۱۱ ربیع الاول ۱۴۴۶ / ۲۴ وږی ۱۴۰۳
د افغانستان اسلامي امارت د صنعت او سوداګرۍ وزارت سرپرست محترم الحاج نورالدین عزیزي د خپل کار په دفتر کې په کابل کې د قزاقستان جمهوریت له سفیر علیم خان یسین گیلدیف سره کتنه وکړه.
پدې کتنه کې چې نن د وږي(سنبلې) په ۲۴ مه تر سره شوه، ښاغلي ګیلدیف په افغانستان کې د خپلې دندې له پای ته رسیدو څخه د سوداگرۍ محترم وزیر ته خبر ورکړ او د صنعت او سوداګرۍ وزارت له مشرتابه څخه یې د افغانستان او مینځنۍ آسیا هېوادونو تر مینځ د سوداګرۍ د مناسبې فضا را مینځ ته کولو له امله مننه وکړه.
همدارنګه ښاغلي عزیزي په افغانستان کې د ښاغلي ګیلدیف د کار او ماموریت ستاینه وکړه او نوموړی یې د دواړو هېوادو تر مینځ د سوداګریزو اړیکو په ټېنګښت کې یو موثر او اغېزناک شخصیت و ګڼلو.
