د صنعتي سیمو د قانون د تنفیذ او پلي کېدو د څرنګوالي په اړه یوه کاري ناسته جوړه شوه
پنجشنبه ۲۵ صفرالمظفر ۱۴۴۶ / ۸ وږی ۱۴۰۳
په هغه ناسته کې چې د صنعت او سوداګرۍ وزارت د معین محترم مولوي احمدالله زاهد په مشرۍ او د صنعتي پارکونو او صنایعو د چارو عمومي رییس او د ځمکو د وېش د اسنادو د څېړنې او ارزونې د پلاوي د مشر محترم قاري عبدالمجید قیام، ددې عمومي ریاست د اړونده رییسانو او د ارزونې د پلاوي د محترمو غړیو په ګډون جوړه شوې وه، د صنعتي سیمو د قانون د پلي کېدو پر څرنګوالي بحث وشو.
په لومړي سر کې د صنعتي سیمو د قانون د پړاونو بشپړولو پروسې د څرنګوالي په اړه یو پرېزنتېشن د وزارت د حقوقي چارو د رییس له خوا وړاندې شو .
ورپسې د ناستې ګډونوالو ددې قانون د لا ښه پلي کېدو پر لارو چارو بحث وکړ او خپل نظریات یې له اړونده مسوولینو سره شریک کړل.
د صنعت او سوداګرۍ وزارت معین د صنعتي سیمو قانون د هېواد د اقتصادي ودې لپاره مهم وګڼلو او د ځمکو د وېش په اړه یې د اسنادو د ارزونې او څېړنې پلاوي د فعالیتونو او کارونو پر آسانه کولو ټېنګار وکړ.
د یادولو وړ ده چې د صنعتي سیمو( پارکونو) قانون پر یوې سریزې سربېره ۶ بابه، ۱۱ فصله او ۶۷ مادې لري چې په پنځلسمه ماده کې یې د عمومي رییس تر مشرۍ لاندې یو رییس له اوو تنو غړیو سره د ځمکو د اسنادو د ارزونې او څېړنې لپاره ګومارل شوي دي.
