د استانبول په نړیوال حلال نندارتون کې په لومړي ځل د افغانستان حضور

سه شنبه ۱۲ ربیع الثانی ۱۴۴۶ / ۲۴ تله ۱۴۰۳

په هغه ناسته کې چې د افغانستان د اسلامي امارت د صنعت او سوداګرۍ د سرپرست وزیر محترم الحاج نورالدین عزیزي په مشرۍ، د سکتوري خونو د محترمو استازو او د غالیو تولیدونکو او صادرونکو اتحادیې د استازو په ګډون ترسره شوه، په استانبول ښار کې جوړیدونکي د ۲۰۲۴ حلال نړیوال نندترتون کې د افغانستان پر ګډون او له افغانستان څخه پدې نندارتون کې ګډونوالو ته په پام کې نیول شوې آسانتیاوې و ارزول شوې.

پدې نندارتون کې چې ټاکل شوې د ۲۰۲۴ زېږدیز کال د نوامبر له ۲۷مې تر ۳۰ مې ( د ۱۴۰۳ لمریز کال د لیندۍ( قوس) له شپږمې تر نهمې ) د ترکیې په استانبول ښار کې جوړ شي، په لومړي ځل د افغانستان د اسلامي امارت د صنعت او سوداګرۍ وزارت مشرتابه او د هېواد خصوصي سکتور ته، د ګډون او نندارې ته د خپلو محصولاتو او تولیداتو د وړاندې کولو لپاره رسمي بلنه ورکړل شوې ده.

د استانبول حلال نندارتون د اسلامي نړۍ په کچه یو له سترو نندارتونو څخه دی او د ټولې نړۍ په کچه دریم لوی نندارتون دی چې تېر کال په استانبول کې پدغه نندارتون کې د نړۍ له ۱۲۵ هېوادو څخه د سوداګرۍ د ۶۰ وزیرانو په ګډون، سوداګرو،صنعت کارانو او پانګوالو ګډون کړی وو.

د یادونې وړ ده چې د دې نندارتون په څنډه کې سوداګریز کنفرانسونه، د سوداګریز تواصل یا راکړې ورکړې ناستې او نور اقتصادي پروګرامونه هم جوړیږي.