د ترکمنستان جمهوریت د سوداګرۍ اتحادیې له رئیس سره د صنعت او سوداګرۍ وزارت سرپرست لیدنه
شنبه مورخ ۲۰ شعبان المعظم ۱۴۴۵ / ۱۲ کب ۱۴۰۲
د افغانستان د اسلامي امارت د صنعت او سوداګرۍ وزارت سرپرست الحاج نورالدین عزیزي او ورسره پلاوي د ترکمنستان جمهوریت د سوداګرو او صنعت کارانو د اتحادیې له رئیس ښاغلي نوکر قلي آتاقي اوف سره وکتل.
په دې کتنه کې ښاغلي آتاقی اوف د ترکمنستان جمهوریت ته د افغانستان د اسلامي امارت د صنعت او سوداګرۍ د سرپرست وزیر په مشرۍ د دولتي او خصوصي سکتور د ګډ پلاوي هرکلی وکړ.
هغه د ترکمنستان-افغان سوداګريزپیوستون کنفرانس او نندارتون پرانيستل د دواړو هېوادونو د نږدېوالي لامل وباله.
د افغانستان د اسلامي امارت د صنعت او سوداګرۍ وزارت سرپرست الحاج نورالدین عزیزي په هغه هېواد کې د افغان حکومت او خصوصي سکتور له پلاوي دګرم استقبال څخه مننه وکړه او یاد کنفرانس يې د دواړو هېوادونو ترمنځ د سوداګرۍ د ودې لپاره مهم ګام وباله.
نوموړي له افغانستان څخه د سوېلي اسيا هېوادونو ته د ترانزيت د لارو چارو، په افغانستان کې د پانګونې د زمینې مساعدوالي او په دغه هېواد کې د پانګونې د ګټو په اړه خبرې وکړې.
