د خصوصي سکتور له غړیو سره مشورتي آن لاین ناسته

شنبه 7 شوال المکرم 1446 / 16 حمل 1404

د ا.ا.ا. د صنعت او سوداګرۍ وزارت سرپرست محترم الحاج نورالدین عزیزي د روسیې د کازان ښار په نړیوال حلال نندارتون کې د افغانستان د فعال ګډون او په یاد نندارتون کې نندارې ته د هېواد د باکیفیته تولیداتو او محصولاتو د وړاندې کولو او د دغه هېواد په مسکو په ښار کې د افغانستان د تولیداتو او محصولاتو د نندارتون د ښه جوړښت په موخه د هېواد د خصوصي سکتور له مشرانو او غړیو سره به آن لاین بڼه مشورتي غونده ترسره کړه.

پدې ناسته کې د کازان په نړیوال حلال نندارتون کې نندارې ته د وړاندې کولو او هغوی ته د بازار موندنې په موخه د هېواد د ارزښتناکه محصولاتو او تولیداتو د وړاندې کولو او همدارنګه د شرکتونو مشرانو او د اتحادیو غړیو د ګډون په تړاو، د مالي لګښتونو، افغانستان ته پدې نندارتون کې د په پام کې نیول شوي مساحت په اړه او په مسکو ښار کې د افغاني تولیداتو او محصولاتو د نندارتون په هکله خبرې او د نظرونو تبادله وشوه.

د هېواد د خصوصي سکتور غړیو او مشرانو ددې ناستې له جوړیدو د هرکلي په ترڅ کې، د کازان په نړیوال حلال نندارتون کې د ښه او غوره ګډون او په مسکو کې د افغان محصولاتو او تولیداتو د ځانګړي نندارتون د جوړښت په اړه خپل نظریات او لید لوري شریک کړل او وړاندیز یې وکړ چې روسیې ته د افغاني پلاوي تر سفر وړاندې، د ا.ا.ِا. د صنعت او سوداګرۍ وزارت له خوا دې د ګډون کوونکو شرکتونو چارواکیو ته د یاد نندارتون په تړاو د پوهاوي یو سیمینار جوړ شي او د شرکتونو بروشورونه وڅېړل شي او معیاري دې کړای شي.

د صنعت او سوداګرۍ وزارت سرپرست محترم الحاج نورالدین عزیزي د هېواد د تولیداتو او محصولاتو د ورپېژندنې او هغوی ته د بازار موندنې په موخه، په دې ډول نندارتونو کې د افغان لوري په فعال ګډون پر ټینګار سره د خصوصي سکتور له غړیو وغوښتل ترڅو د روسیې د کازان ښار په نړیوال حلال نندارتون کې د ښه ګډون او په مسکو کې د افغاني تولیداتو او محصولاتو د نندارتون د ښه ترسره کېدو په موخه خپل نظریات او وړاندیزونه د ارتباطي ګروپونو له لارې د صنعت او سوداګرۍ له وزارت سره شریک کړي.