د 1.5 میلیون ډالرو په ارزښت له 12 موسسو سره د همکارۍ هوکړه لیکونه لاسلیک شول
چهارشنبه26 رمضان المبارک 1446 / 6 حمل 1404
د افغانستان د اسلامي امارت د صنعت او سوداګرۍ وزارت سرپرست محترم الحاج نورالدین عزیزي نن چهارشنبه د ۱۴۰۴لمریز کال د وري په ۶ مه نېټه په هېواد کې د تشبثاتو سکتور د ملاتړ او پیاوړتیا په موخه له ۱۲ موسسو سره د همکارۍ هوکړه لیککونه لاسلیک کړل.
د صنعت او سوداګرۍ وزارت سرپرست محترم الحاج نورالدین عزیزي د پروژو د پلي کولو په لار کې د اسلامي امارت د پالیسیو د پلي کولو په لار کې پر عملي توب ټینګار وکړ او ویې ویل: د سوداګرۍ وزارت ستاسو د هڅولو او ستاسو د چارو د ګړندیتوب په موخه تل هڅه کړې چې اړونده اسناد ژر تر ژره لاسلیک شي او له یادو موسسو یې وغوښتل تر څو د پروژو مالي ملاتړ کوونکو ته د خپلو طرحو د وړاندې کولو پر وخت، مهاجرینو ته لومړیتوب ورکړي.
ټاکل شوې ده چې دغه ۱۲ موسسې یادې پروژې د ظرفیت جوړونې،د کورنیو د مالي اړتیاوو پوره کولو او د درامد په ترلاسه کې ابتکار، سلمه دوزۍ او ډیزاین زده کړې، د وړو سوداګریو مدیریت، بېرته را ستنیدونکو ته د معشیتي فرصتونو د لاسرسي د زیاتوالي او پایښت او متشبثینو ته د غالۍ اوبدلو او ګرافیک ډیزاین د زده کړې په برخو کې د یو میلیون 553 زرو او 180 ډالرو په ټولیز ارزښت د هېواد په ۱۲ولایتونو کې تطبیق کړي.
د یادولو وړ ده چې له دغه پروژو څخه به یو زر او اوه تنه نېغ په نېغه د کندوز، لوگر، فاریاب، ننگرهار، کابل، بدخشان، بامیان، هرات او تخار په ولایتونو کې ګټه پورته کوي.
