د پکتیا پوهنتون مسئولینو سره لیدنه
پنج شنبه مورخ ۳ محرم ۱۴۴۵ / ۲۹ چنګاښ ۱۴۰۲
د صنعت او سوداګرۍ وزارت سرپرست وزیر ښاغلي الحاج نورالدین عزیزی د پکتیا پوهنتون علمي مرستیال، پوهندوی سیف الرحمن روهی، او د یاد پوهنتون د اقتصاد پوهنځي رئیس پوهنمل شفیع الله غوثی سره لیدنه وکړه او د ګډو همکاریو، او دوه اړخیزو مسائیلو باندي خبرې اترې وکړې.
الحاج عزيزي د پوهنتونونو او علمي بنسټونو استادانو د اهميت او مقام په اړه خبرې وکړې او ويې ويل چې د هېواد د ودې او پرمختګ په برخه کې د استادانو مقام او ونډه موږ ته څرګند دى او په تېرو دوو کلونو کې مو په ډېرو مواردو کې محترم استادان غونډو ته رابللي دي چې د متوازنې سوداګرۍ او د هېواد د صادراتو د ودې په برخه کې د هغوى نظرونه ترلاسه کړو. ښاغلي عزیزی وویل چې د صنعت او سوداګرۍ وزارت په ټولو ګډو برخو کې هر راز همکارۍ ته چمتو دی.
د پکتيا پوهنتون علمي مرستيال د صنعت او سوداګرۍ وزارت د مشرتابه له پاملرنې څخه په مننې سره وویل چې د هېواد په کچه به يو سمپوزيم جوړ کړي او پکتيا پوهنتون بېلابېل علمي پروګرامونه په نظر کې لري. د پکتیا پوهنتون علمي مرستیال د صنعت او سوداګرۍ وزارت له مشرتابه څخه غوښتنه وکړه، چې په یو ګډ تفاهم لیک باندي کار وکړي.
د صنعت او سوداګرۍ وزارت سرپرست وزیر د ښاغلي روهی خبرې په تائید سره مسوولینو ته یې لارښوونه وکړه، چې د پکتیا پوهنتون له مسوولینو سره د بحث وړ موضوعاتو باندي خبرې اترې وکړي.
