د پل چرخي له صنعتي پارک  څخه لیدنه

یکشنبه:د تلې۱۱مه ۱۴۰۰

د صنعت او سوداګرۍ سرپرست وزیر ښاغلي نورالدین عزیزي، په پل چرخي صنعتي ښارګوټي کې د تولیدي فابریکو څخه د لیدنې پرمهال، د افغانستان د صنایعو او معادنوخونې مشرتابه او د صنعتکارانو سره د یادې خونې په مرکزي دفتر کې وکتل،په دې لیدنه کې د صنعت سکتور پروړاندې د ستونزو او ننګونو په هکله خبرې ترسره شوی.

په پیل کې  د کابل د صنعت او کانونو خونې سرپرست ښاغلي حاجي ظریف ګل ځدران ،ښاغلي عزیزي او ورسره پلاوي ته د ښه راغلاست ترڅنګ  وویل چې صنعتکاران ژمن دي چې د کورني صنعت ودې او د سوکاله افغانستان لپاره هلې ځلې جاري وساتي ،په هیواد کې به د صنعت ودې او پراختیا لپاره خپلې هڅې ونه سپموي.

ورپسې د افغانستان د صنایعو او کانونو د بورډ رییس ښاغلي شیرباز کمین زاده، د افغانستان صنایعو د ټولنې رییس ښاغلي عبدالجبار صافی او یوشمیر نورو صنعتکارانو ،د صنعت کارانو پر وړاندې پر ستونزو او ننګونو دیادونې ترڅنګ وویل چې د صنعتي سکتور ملاتړ پرته به افغانستان ونشې کولاي ترڅو اقتصادي سوکالی  ترلاسه کړي

په دې ناسته کې د صنعت او سوداګرۍ وزیر ښاغلي نورالدین عزیزي د خپلو خبرو پرمهال وویل چې د صنعت او سوداګرۍ وزارت د صنعت کارانو پروړاندې د شته ستونزو حل لپاره هر ډول همکارۍ ته چمتو دی اود صنعت کارانو  سره په مشوره هڅه کوي ترڅو لازمې د حل لارې ورته ومومې.

 ښاغلي عزیزي ټینګار وکړ چې د صنعت او سوداګرۍ وزارت به د صنعت کارانو سره  ګډې تخنیکي کمیټې په جوړولو هغوي سره له نږدې کار وکړي او د ستونزو پیژندلو پرمهال به ورته د حل لاري پیدا او عملي کیدو لپاره به يې اقدام وکړي.

په پای کې د صنعت او سوداګرۍ وزیر، د صنعتکارانوپه شتون کې، له یو شمیر فابریکو څخه لیدنه وکړه او د صنعت په ډګر کې شوې لویې پانګوونې یې له نږدې څخه وستایلې.

یاده دې وي  چې د صنعت او سوداګرۍ سرپرست وزیر لخوا په کابل او د هیواد لویو ولایتونو کې د شته تولیدي فابریکو د لیدلولړۍ دوام لري.