د پاکستان له ځانګړي ستازي سره د افغانستان د اسلامي امارت د صنعت او سوداګرۍ وزارت د سرپرست لیدنه

شنبه 22 رمضان المبارک 1446 / 2 حمل 1404

د افغانستان اسلامي امارت د صنعت او سوداګرۍ وزارت سرپرست محترم الحاج نورالدین عزیزي نن تر غرمې وروسته د افغانستان لپاره د پاکستان د ځانګړي استازي محمد صادق خان او ورسره پلاوي سره لیدنه او خبرې اترې وکړې.

دغه ناسته او خبرې د دواړو هېوادو تر مینځ د شته سوداګریزو او ترانزیتي ستونزو د څېړنې او د دواړو هېوادو تر مینځ پر اقتصادي اړیکو د سیاسي تاوتریخ والي د اغېزو مخنیوي او د بنسټیزو اقتصادي ستونزو د حل په موخه ترسره شوه.

پدې ناسته کې دواړو لوریو د دوه اړخیزو منظمو ناستو پر اهمیت، د سوداګریزو اړیکو پر عادي کولو، د ترجیحي سوداګرۍ یا (PTA) د هوکړه لیک پر نهایي کولو، د دواړو هېوادو تر مینځ د سوداکریز تړون (APTTA) په اړه د ستونزو پر حل ټینګار وکړ.

همدارنګه پدې ناسته کې افغانستان ته د پاکستان د لومړي وزیر د مرستیال او همدارنګه پاکستان ته د افغانستان د اسلامي امارت د پلاوي پر سفرونو، پر شته سوداګریزو ستونزو، د افغانستان پر فصلي او موسمي اړتیاوو او د افغانستان پر اقتصادي ودې هم خبرې اترې وشوې.

محترم الحاج نورالدین عزیزي، له دغه لیدنې کتنې د هرکلي په څنګ کې څرګنده کړه چې دا سفر د دوه اړخیزو اړیکو د پیاوړتیا او په تېره بیا د سوداګرۍ په اړخ کې رغنده او مثبت ګام شمېرل کېږي. همدارنګه د صنعت او سوداګرۍ وزارت سرپرست د وارداتو او صادراتو په برخه کې د خنډونو دلیري کولو لپاره پر متقابلې همکارۍ ټینګار وکړ او راتلونکی کرهنیز فصل یې د دواړو هېوادو تر مینځ د اقتصادي راکړې ورکړې لپاره ښه فرصت وګڼلو.

 ددې لیدنې په پای کې دواړو لوریو د ګډو خبرو اترو پر دوام او د سوداګرۍ او ترانزیت په برخه کې د آسانتیاوو راپیدا کولو لپاره د عملي ګامونو پر اخیستلو ټینګار وکړ.همدارنګه پدې لیدنه کې وویل شول چې پاکستان له افغانستان سره د اقتصادي همکاریو د پیاوړتیا لپاره ستراتیژیک فرصت په لاس کې لري  چې کولای شي د دواړو هېوادو د اقتصادي غوړیدا په برخه کې مرسته وکړي.