د ملت د استازو د سالمو وړاندیزونو اوریدل او د قانون په رڼا کې ورته د حل لارې موندل زموږ لومړیتوب دی !
د افغانستان د صنعت او سوداګرۍ مرستیال او سرپرست وزیر ښاغلي اجمل حمید عبدالرحمیزي نن د کندهار، پکتیکا او ارزګان له استازو سره ولیدل.
یادو استازو د خپلو اړوندو ولایتونو د سوداګریز بهیر او پر وړاندې یې پرتې ستونزې له سرپرست وزیر سره شریکې کړې او په دې برخو کې یې د ګامونو اچتولو غوښتنه وکړه.
ښاغلي عبدالرحیمزي د وزارت په استازیتوب ډاډ ورکړ چې یادې ستونزې به له اړوندو څانګو سره شریکې کړي. سرپرست وزیر وویل د صنعت او سوداګرۍ وزارت مشرتابه د هیواد د سوداګریز بهیر د ښه والي، د اسانتیاوو رامنځته کولو او د خصوصي سکتور د ملاتړ په برخو کې خپلې ژمنتیاوې لري او په یادو برخو کې یې تر دې دمه ځینې کوټلي ګامونه هم پورته کړي.
