د صنعت او سوداګرۍ وزارت اړونده ځینو آمرینو ته موټرسایکلونه ور تسلیم کړای شول

چهارشنبه ۸ ربیع الاول ۱۴۴۶ / ۲۱ وږی ۱۴۰۳

نن چهارشنبه د ۱۴۰۳ لمریز کال د وږي یا سنبلې په ۲۱مه نېټه تر غرمې مخکې، د هېواد په اتو ولایتونو کې دندې ته پر وخت د رسیدو او په صنعتي پارکونو کې د فعالیتونو د څارنې او ارزونې په موخه، د صنعت او سوداګرۍ اړونده آمرینو ته اته عرادې موټر سایکلونه ورکړل شول.

د پامیر سکلیت د شرکتونو ګروپ د صنعت او سوداګرۍ وزارت اړونده کارکونکو ته د آسانتیا برابرولو په موخه یو شمېر سوپر پامیر موټرسایکلونه دغه وزارت ته سپارلي وو چې له هغې څخه اته عرادې د اړتیا له مخې نن د خوست، لوگر، میدان وردګو، کندوز، تخار، جوزجان، پکتیا او هلمند ولایتونو د صنعت او سوداګرۍ ریاست اړوند آمرینو ته تسلیم کړای شول.

د صنعت او سوداګرۍ وزارت د هېواد دخصوصي سکتور او په تېره بیا پامیر سکلیت شرکت له همکارۍ مننه وکړه او د هېواد د صنعتي پارکونو د فعالیتونو د پرمخ بیولو لپاره یې د پامیر سکلیت شرکت دغه اقدام ګټور او اغېزمن وګڼلو.