چهارشنبه: دلیندۍ 26 مه1399

دصنعت او سوداګرۍ وزارت درهبرۍ په مشرۍ، دخصوصي سکتور داستاز او داړونده دولتي ادارو په ګډون، د خصوصي پانګوونې قانون د مسودې، بیاکتنې په اړه غونډه دیاد وزارت دکنفرانسونو په تالار کې تر سره شوه.

دصنعت او سوداګرۍ وزیر ښاغلي نثار احمد غوریاني په یاده غونډه کې وویل، پکار ده چې د خصوصي پانګوونې په قانون جوړولو کې دخصوصي سکتور او اړونده دولتي ادارو نظرونه شامل او داسې یو قانون رامنځته شي چې په راتلونکي کې دخصوصي پانګوالو لپاره ستونزې او ننګونې رامنځته نه کړي.

ښاغلي غوریاني په ډاګه کړه چې دیاد قانون په بشپړیدو سره به بهرنیو او کورنیو خصوصي پانګوالو ته ډیرې اسانتیاوې رامنځته شي او دپانګونې په راجلبولو سره به داقتصادي ودې زمینه هم برابره شي.

په یاده غونډه کې دخصوصي سکتور او اړونده دولتي ادارو استازو د یاد قانون دبشپړېدو په موخه خپل نظرونه دصنعت او سوداګرۍ وزارت دپانګونې دپراختیا له ریاست سره شریک کړل ترڅو ددغه قانون له بشپړېدو سره مرسته وکړي.

دیادولو وړ ده چې دصنعت او سوداګرۍ وزارت د خصوصي پانګوونې قانون دمسودې پر تعدیل سربېره دخصوصي بهرنۍ او کورنۍ پانګونې دراجلبولو، دصنعت او سوداګرۍ دملاتړ په موخه یو شمېر نوې تګلارې تر لاس لاندې لري.