د ترانزیت ملي کومېټې په اوومه ناسته کې د سوداګرو او ترانسپورټي شرکتونو ستونزې و څېړل شوې
سه شنبه ۱۶ صفرالمظفر۱۴۴۶ / ۳۰ زمری ۱۴۰۳
د ترانزیت د ملي کومېټې اوومه ناسته د صنعت او سوداګرۍ وزارت د سرپرست محترم الحاج نورالدین عزیزي تر ریاست لاندې او ددې کومېټې د محترمو غړیو په ګډون نن غرمه د یاد وزارت د مجلسونو په تالار کې جوړه شوه.
په یاده ناسته کې د صنعت او سوداګرۍ وزیر محترم الحاج نورالدین عزیزي، د ترانزیټ لګښتونو او د ملت د زیانمنېدو موضوع ته په پاملرنې سره وویل چې باید د هېواد په ټولو بندرونو کې د نړیوالو معیارونو سره سم د سوداګرۍ او ترانسپورټ لپاره آسانتیاوې او خدمتونه برابرې شي.
پدې ناسته کې د هېواد په بندرونو کې د سوداګرو او ترانسپورټي شرکتونو د ستونزو او د نورو هېوادو په بندرونو کې د هغوی پر ستونزو بحث او خبرې وشوې.
د مجلس په پای کې د بحث د آجنډا سره سم د هېواد په بندرونو کې د ترانسپورټي شرکتونو او سوداګرو ستونزو ته د رسېدنې په برخه کې اړونده ادارو ته دندې وسپارل شوې.
