پنج شنبه دکب ۲۱مه ۱۳۹۹

په اقتصادې او سوداګریزو چارو کې د افغانستان ـــــ اوکراین حکومتونو ترمنځ د ګډ کمیسیون دویمه ناسته د دواړو هیوادونو د دولتی مقاماتو د پلاوو او خصوصي سکتور استازو په ګډون د یاد هیواد د کیف په ښار کې ترسره شوه .

په دې ناسته کې دصنعت او سوداګرۍ وزیر ښاغلي نثاراحمد غوریاني د افغان دولتي پلاوې په مشرۍ، په حقوقي چارو کې د جمهور رئیس سلاکاراو د جمهوري ریاست د حقوقي واحد رئیس ښاغلي کبیرخان عیسی خیل،د پانګونې د اسانتیاوو دواحد رئیس ښاغلي عطاالله نصیب ،د مالېې،ملی دفاع،کرنې مالدارۍ، وزارتونو مرستیالانو،دافغانستان دملکې هواپیژندنې ادارې،دریل پټلې ادارې،کابل ښاروالۍ،د پارلمان وکیلانو، خصوصي سکتور استازو او د یوشمیروزارتونو او ادارو رئیسانو ګډون درلود.

په یاده ناسته کې په بیلابیلو برخو کې لکه سوداګرۍ،کرنې،صنعت،شاروالۍ،ریل پټلۍ،معادنو، پطرولیم،او هوا پیژندنې په برخه کې د دوه، اړخیزو همکاریو د پراختیا او پیاوړتیا په هکله خبرې اترې وشوې.

دصنعت او سوداګرۍ وزیراو د افغانستان د دولتي اوخصوصي پلاوي رئیس ښاغلي نثاراحمد غوریاني ددې ناستې په پیل کې وویل چې د اقتصادي او سوداګریزو همکاریو پراختیا د دواړونو هیوادونو د اقتصاد

او سوداګرۍ په ګټه ده،دحکومتونو دګډ کمیسون په دویمه غونډه کې به داقتصادي،سوداګریزو،ترانزیټي،کرنیزو او نورو سکتورونو د همکارۍ په پراختیا کې لازمې او ښې پریکړې وشي.

د ناستې په پای کې د غونډې پروتوکول د دواړونو هیوادونو د پلاوو د رئیسانو لخوا په رسمي ډول لاسلیک شو،چې په دې پروتوکول کې د دواړونو هیوادونو ترمنځ د همکارۍ په عمده برخو هوکړه وشوه.

د افغانستان لپاره یو د مهمو او مثبتو ټکو څخه د لاجوردو د لارې سره د اوکران پیوستون دی، چې د افغانستان دولت لخوا يې هرکلي وشو او دهغه د پلي کولو په میکانیزم د دواړو هیوادونو ترمنځ د لاسلیک شوي پروتوکول په متن کې هم هوکړه وشوه.

د افغانستان اسلامي جمهوري دولت ـــــ اوکران دولت د حکومتونو ترمنځ ګډ کمیسیون د ۲۰۱۷ زیږدیزکال د اپریل په ۱۵ او د ۱۳۹۶لمریزکال د وری ۲۶ نیټې د هوکړه لیک پربنسټ رامنځته شوی دی.

د ګډ کمیسون لمړۍ ناسته ددواړو هیوادونو د مقاماتو ترمنځ په ۲۰۱۹ زیږدیزکال د کیف په ښار کې ترسره شوی وه .

په دې سفر کې د افغانستان پلاوی د یاد کمیسون د غونډې سربیره په پام کې لرې چې د اوکراین هیواد د صدراعظم، دصداعظم مرستیال،د اوکراین صنایعو او سوداګرۍ خونې،د اوکران هیواد د دفاع وزارت مقاماتو،د اوکراین د ګمرکاتواو بندرونو،د ریل پټلۍ،شاورالۍ ، ددې هیواود د نظامي تولیدې وسایلو او وسایطو څخه هم لیدنه وکړي.