اردني سوداګر د سوداګرۍ وزارت له مرستیال سره ولیدل
چهارشنبه مورخ ۳۰محرم ۱۴۴۵ / ۲۶زمری ۱۴۰۲
د عربي هیواد اردن یو تن مخکښ سوداګر دوکتور غازي احمدالمریش د صنعت او سوداګرۍ وزارت له مرستیال ښاغلي مولوي قدرت الله جمال سره ولیدل.
ښاغلي المریش د خپلو خبرو په ترڅ کې په افغانستان کې پانګه اچونې ته لېوالتیا وښوده. نوموړي وویل چمتو دی چې اردن ته د افغاني صادراتو په لېږد کې هلې ځلې وکړي. په وینا یې وچه مېوه او معدني توکي هغه څه دي چې غواړي اردن ته یې ولېږدوي.
د وزارت مرستیال ښاغلي جمال د ښاغلي المریش په راتګ خوښي وښودله او زیاته یې کړه چې افغانستان کې بهرنیو پانګوالو لپاره له پخوا هر وخت څخه زیات د پانګه اچونې ښه زمینه مساعده شوې او دوی په ډاډه زړه تګ راتګ او سوداګریز فعالیت ترسره کوی شي.
نوموړي زیاته کړه چې اسلامي امارت بهرنیو سوداګرو لپاره اسانتیاوې رامنځته کړې او لا نورې اسانتیاوې هم په پام کې لري.
