په لغمان کې د داخلي توکیو درې ورځنۍ نندارتون پرانیستل شو

سه شنبه ۸ جمادی الثانی ۱۴۴۶ / ۲۰  لینډی ۱۴۰۳

د لومړي ځل لپاره په لغمان ولایت په مرکز مهترلام ښار کې د داخلي تولیداتو او محصولاتو نندارتون پرانیستل شو.

د لغمان ولایت د صنعت او سوداګرۍ ریاست وایي چې دغه درې ورځنۍ نندارتون چې د ۱۴۰۳ لمریز کال د لیندۍ( قوس) په ۲۰مه نېټه د یاد ریاست او د "موج ویژن" بازار موندنې خدماتی خصوصي شرکت په همکارۍ جوړ شوی او تر درې ورځو دوام وروسته د لیندۍ په ۲۲ مه نېټه به پای ته ورسیږي.

ددې نندارتون په پرانیست غونډه کې ړ لغمان ولایت والي او د اړونده ریاستونو مسؤولینو ګډون کړی و چې ټولو د دې ډول نندارتونو جوړول د کورني تولید د ودې او بازار موندنې لپاره اړین وګڼل.

پدې نندارتون کې د لغمان ولایت د صنعت او سوداګرۍ رياست او نورو اړونده سکتوري بنسټونو او خصوصي سکتور په ګډه د خپل هیواد محصولات او تولیدات نندارې ته وړاندې کړي دي. پدې نندارتون کې بېلابېل تولیدي، سوداګریز او خدماتي سکتورونه لکه کرهنه، صنعت، کانونه، روغتیا، مخابرات، لوړې زده کړې او په پراخه کچه برخه لري.