د چین د نړیوالې سوداګرۍ د ودې شورا مرستیال او د افغانستان ا.ا د صنعت او سوداګرۍ وزارت د مرستیال تر منځ د لیدنې راپور

دوشنبه 28 ذوالقعدةالحرام 1446 / 5 جوزا 1404

د چین د نړیوالې سوداګرۍ د ودې شورا مرستیال ښاغلي چین جیانان د افغانستان ا.ا د د صنعت او سوداګرۍ وزارت د مرستیال  او پلاوي ته تود هرکلی ووایه، او د چین او افغانستان تر منځ د ښو سیاسي او اقتصادي اړیکو ستاینه یې وکړه. نوموړي وویل  چې د چین د نړیوالې سوداګرۍ د ودې شورا د هېواد د دولت او دولتي تصدیو تر منځ د یو پُل رول لري او هڅه کوي چې کورني او بهرني شرکتونه د چین له سوداګریزو فرصتونو سره ونښلوي.

ښاغلي جیانان وویل، چین له ګڼو سیمیزو هېوادونو سره ژورې تجارتي اړیکې لري، او غواړي د افغانستان سره هم دا اړیکې لا ژورې او پراخې کړي. نوموړي ټینګار وکړ چې د شورا ماموریت د پانګوالو او تصدیو لپاره د همکارۍ زمینې برابرول، فرصتونه پېژندل، او دولتي بنسټونو سره د اړیکو پیاوړتیا ده.

ورپسې، د افغانستان د صنعت او سوداګرۍ وزارت مرستیال ښاغلي مولوی احمدالله زاهد، له چینایي لوري څخه د هرکلي مننه وکړه او څرګنده یې کړه چې چین د نړۍ له مخکښو اقتصادي قوتونو څخه ده، او افغانستان غواړي د چین له پرمختللو تجربو څخه په صنعت، سوداګرۍ، پانګونې، او زیربنایي برخو کې ګټه ترلاسه کړي.

ښاغلي زاهد وړاندیز وکړ چې دواړه هېوادونه کولای شي د چینایي شرکتونو او تصدیو په همکارۍ د افغانستان په بېلا بېلو سیمو کې د صنعتي پارکونو، ځانګړو اقتصادي زونونو، صادراتو د پروسس مرکزونو، سړو خونو، او عصري صنعتي او زراعتي لابراتوارونو جوړولو ته زمینه برابره کړي. دا ټول اقدامات به د افغانستان د صادراتي سکتور د پیاوړتیا او صنعتي پراختیا لپاره مهم ګامونه وي.

همداراز، دواړو لوریو هوکړه وکړه چې د افغانستان د امارتي شرکتونو او د چین د نړیوالې سوداګرۍ د ودې شورا تر منځ به مستقیمې او ګټورې اړیکې ټینګې شي. د دې تر څنګ، چمتووالی وښودل شو چې افغان سوداګرو ته په چین کې د سوداګریزو نندارتونونو کې د ګډون زمینه برابره شي، تر څو هغوی د نړیوال بازار سره ونښلول شي.

پایلې او هوکړې:

1_ د چین د نړیوالې سوداګرۍ د ودې شورا استازی به د نږدې همکارۍ په موخه کابل ته سفر وکړي.

2_ د چین لوري وړاندیز وکړ چې ټول پانګیز فرصتونه او مشخصې طرحې دې له اړوندو ډیپلوماتیکو ادارو سره شریکې شي، تر څو د شورا له خوا لازم اقدامات وشي.

3_ دواړو خواوو هوکړه وکړه چې ګډ کاري میکانېزم جوړ کړي او د راتلونکو عملي ګامونو لپاره همغږي وساتي.