د خصوصي سکتور له اړخه د ښو خدمتونو د وړاندې کولو او هغوی ته د لازمو آسانتیاوو برابرولو په موخه هڅې

چهارشنبه11 شوال المکرم 1446 / 20 حمل 1404

له خصوصي سکتور څخه د ملاتړ صندوق د مشرتابه کمیټې څلورمه ناسته د یادې کمیټې( چې د خصوصي سکتور او اړونده ادارو څخه جوړه شوې) د غړیو په ګډون، د صنعت او سوداګرۍ وزارت د سرپرست محترم الحاج نورالدین عزیزي په مشرۍ نن تر غرمې مخکې ترسره شوه.

پدې جلسه کې د یاد صندوق د تخنیکي کمیټې د محترمو غړیو د ناستو او پریکړو راپور وړاندې شو او په تېره بیا د دریو تنو تخنیکي او اداري کسانو د استخدام په اړه او په یوه کال کې د هغه لسو پروژو د مشخصولو په تړاو خبرې وشوې چې ټاکل شوې ده د یاد صندوق له خوا یې مالي ملاتړ وشي.

همدارنګه د مشرتابه کمیټې د عملي کړنو، لا ښې باور جوړونې او د کارونو بهیر د چټکتیا په موخه، په بندرونو کې د کمپلکس جوړونې، د هېواد په اوو زونونو کې د سړو خونو د جوړونې ، په زونونو کې د صادراتو د پروسس مرکزونو د جوړونې او پدې وزارت کې د تخنیکي ټیم لپاره د دفتر د برابرونې په تړاو خبرې وشوې او نظرونه سره تبادله شول.

په پایله کې د هېواد په بندرونو کې د کمپلکس جوړونه، د دوامداره فعالیت په موخه یاد صندوق ته صنعت او سوداګرۍ په وزارت کې د دفتر ورکړه، د هېواد په اوو زونونو کې د سړو خونو جوړول، د خصوصي سکتور څخه د ملاتړ صندوق د مشرتابه له خوا تصویب شول او تخنیکي کمیټې ته دنده وسپارل شوه تر څو د هېواد په اوو زونو کې د سړو خونو او کمپلکس د جوړولو د تخنیکي موضوعاتو او د تخنیکي ټیم دفتر ته د وسایلو او تجهیزاتو پر اخیستلو کار وکړي.

همدارنګه د هېواد له خصوصي سکتور څخه د ملاتړ صندوق د مشرتابه کمیټې محترمو اغړیو پریکړه وکړه ترڅو د صادراتو د پروسس زونونو بنسټیونه، چهار دیوالۍ او ډیزاین د یاد صندوق له پیسو څخه جوړ کړای شي.