د افغان - تاجیک میرمنو د لاسي صنایعو په ګډ نندارتون ټینګار
دوشنبه: د غبرګولي۱۷مه ۱۴۰۰
د افغانستان د اسلامي جمهوری دولت د صنعت او سوداګرۍ وزیر ښاغلی نثار احمد غوریاني او ورسره مل پلاوی د تاجیکستان په دوشنبه ښار کې د تاجیکو میرمنو د لاسي صنایعو دنندارتون څخه د لیدنې پرمهال په افغانستان او تاجیکستان کې د افغان - تاجیکو میرمنود لاسي صنایعو پر ګډ نندارتون جوړولو ټینګار وکړ.
ښاغلي غوریاني د اطلس په نامه د لاسي صنایعو نندارتون کې وویل چې افغان میرمنې ، لکه د تاجیکو میرمنو په څیر، داصیل افغاني کلتورسره سمې لاسي صنایع او جامې تولیدوي او موږ غواړو په نږدې راتلونکې کې د افغان ـــــ تاجیک میرمنو دلاسي صنایعو ګډ نندارتونونه د دواړو هیوادونو په مختلفو ښارونو کې ترسره کړو .
یاد نندارتون د تاجیکستان جمهوریت د لومړي وزیرمرستیال،د افغانستان د اسلامي جمهوری دولت د صنعت او سوداګرۍ وزیر او روسره مل پلاوي ، دتاجیکستان د صنعت او نوي ټکنالوژی اقتصادي او سوداګرۍ پراختیا، کار او ټولنیزو چارو وزیرانو او د دواړو هیوادونو د خصوصي سکتوراستازوپه شتون کې د تاجیکستان په پلازمینه دوشنبې کې پرانستل شو.
د افغانستان د اسلامي جمهوریت د صنعت او سوداګرۍ وزیر ښاغلی نثار احمد غوریاني د تاجیکستان جمهوریت د صنعت او نوي ټکنالوژی د وزیر په رسمي بلنه د دولتي او خصوصي سکتور د پلاوي په مشرۍ د اقتصادي، صنعتي، سوداګریزو ،ترانزیټي اړیکو او همکاریو د پراختیا لپاره د یاد هیواد په سفر بوخت دی.
