د افغانستان او آذربایجان تر مینځ د سوداګریزې او اقتصادي راکړې ورکړې پر زیاتوالي خبرې وشوې
سه شنبه ۲۰ رجب المرجب ۱۴۴۶ / ۲ سلواغه ۱۴۰۳
د افغانستان د اسلامي امارت د صنعت او سوداګرۍ وزارت سرپرست محترم الحاج نورالدین عزیزي نن سه شنبه د ۱۴۰۳ لمریز کال د سلواغې(دلوې) په دوهمه په افغانستان کې د آذربایجان جمهوریت له سفیر ښاغلي الهام محمدوف سره ولیدل.
پدې لیدنه کې د دواړو هېوادو د مقاماتو تر مینځ د ترسره شویو ژمنو د عملي کولو، د دواړو هېوادو تر مینځ د سوداګریزې راکړې ورکړې د زیاتوالي، په آذربایجان او افغانستان کې د دواړو هېوادو د تولیداتو او محصولاتو د نندارتونونو د جوړولو، په افغانستان کې د پانګونې د فرصتونو په اړه له آذربایجاني پانګوالو او سوداګرو سره د معلوماتو شریکولو او د لاجوردو د لارې د فعاله ساتلو په اړه بحث او خبرې وشوې.
ددې لیدنې په پای کې د دواړو هېوادو تر مینځ د راکړې ورکړې حجم د زیاتوالي او اقتصادي اړیکو د پراختیا په موخه د دواړو هېوادو ترمینځ د صادراتي توکیو د لیست پر شریکولو، په آذربایجان جمهوریت کې د افغانستان د تولیداتو او محصولاتو د نندارتون پر جوړولو او د لا زیاتې همغږۍ او ارتباط په موخه د څلور کسیز ټیم پر معرفۍ هوکړه وشوه.
