د دوه ورځنیو هر اړخیزو بحثونو وروسته، افغانستان او پاکستان د زراعتي توکو پر ترجیحي تعرفو د کمښت هوکړه وکړه
چهارشنبه27 محرم الحرام 1447 / 1 اسد 1404
د صنعت او سوداګرۍ وزارت معین، مولوي احمدالله زاهد، د افغانستان له سفیر مولوي سردار احمد شکیب او مل پلاوي سره یو ځای، د پاکستان د سوداګرۍ وزارت له مرستیال جواد پاول او مل ټیم سره په اسلاماباد کې دوه ورځنۍ رسمي ناستې ترسره کړې.
په پایله کې دواړو لورو هوکړه وکړه چې د افغانستان څلور زراعتي محصولات (انګور، مڼه، انار او بانجان رومي) به پاکستان ته د ترجیحي تعرفې لاندې صادر شي، او په مقابل کې به د پاکستان څلور محصولات (کیله، ام، کچالو او کینو) افغانستان ته د ترجیحي تعرفې سره واردېږي.
یاده هوکړه به د یو کال لپاره عملي وي او د اړینو ارزونو له مخې، د دواړو هېوادونو په مشوره تمدیدېدای او نور اقلام ور اضافه کیدای شي.
همداراز، د ترانزیټ اسانتیاوو، تخنیکي ټیمونو جوړولو او د سوداګرۍ د پراختیا په برخه کې هم رغنده تفاهم رامنځته شو.
