د مالدارۍ اتحاديې له مسئولینو سره لیدنه
دوشنبه مورخ 11 جمادی الثانی 1445 / 4 مرغومی 1402
د صنعت او سوداګرۍ وزارت سرپرست ښاغلي نورالدین عزیزي د هېواد د مالدارۍ د اتحادیې او فارم لرونکو مسؤلینو سره وکتل.
په دې غونډه کې چې د هېواد له بېلابېلو ولایتونو څخه د مالدارانو د اتحادیې او فارم لرونکو مسؤلینو برخه درلوده، ګډونوالو وویل؛ فعلاً افغانستان د شیدو په تولید کې پر ځان بسیا شوی او هغه فابریکې چې شیدو ته اړتیا لري باید د کورنیو شیدو څخه کار واخلي.
همدا راز دوی د بازار د نشتوالي په هکله خپله اندیښنه شریکه کړه او له مشرتابه څخه یې د بازار موندنې په برخه کې د ملاتړ غوښتنه وکړه.
په غونډه کې د صنعت او سوداګرۍ وزارت سرپرست ښاغلي نورالدین عزیزي د دوی د خبرو له اورېدو وروسته د پوره همکارۍ ژمنه وکړه او په وینا یې، له ټولو سیمو د شیدو د راټولولو لپاره باید داسې تګلاره جوړه شي چې د ټولو شیدو لرونکو سیمو څخه شیدې راټولې او په هغو ځایونو کې چې ترې استفاده کېږي هلته ورسول شي.
په پای کې ښاغلي عزیزي د مالدارۍ اتحادیې او له فارم لرونکو مسؤلینو وغوښتل چې په هر ولایت کې د شیدو د تولید دقیق مقدار او یو ټاکلی نرخ وزارت ته په لیکلي ډول وړاندې کړي.
