د صنعت او سوداګرۍ وزارت معین د اوزبیکستان د صنعت، پانګونې او سوداګرۍ وزارت معین سره وکتل
چهارشنبه ۲ذوالقعدة الحرام ۱۴۴۶ / ۱۰ ثور ۱۴۰۴
د صنعت او سوداګرۍ وزارت معین محترم مولوي احمدالله زاهد، په تاشکند کې د افغانستان سفیر او مل پلاوي د اوزبیکستان د صنعت، پانګونې او سوداګرۍ وزارت له معین او د یاد وزارت له یو شمېر رئیسانو سره وکتل.
په دې ناسته کې، ښاغلي زاهد د دواړو هېوادونو ترمنځ د اقتصادي اړیکو پر پیاوړتیا خبرې وکړې او څرګنده یې کړه چې افغانستان او اوزبیکستان د ښه ګاونډیتوب تر څنګ نږدې اقتصادي اړیکې لري. نوموړي زیاته کړه چې دواړه هېوادونه باید په ګډو ټاکل شویو اقتصادي موضوعاتو ژر او اغېزناک کار وکړي.
همدارنګه، ښاغلي زاهد د اوزبیکستان د صنعت، پانګونې او سوداګرۍ وزارت له معین سره د اوزبیکستان په خاوره کې د افغان مېشتو سوداګرو د شته ستونزو د حل په موخه هم مفصل بحث وکړ.
د اوزبیکستان د صنعت، پانګونې او سوداګرۍ وزارت معین د اقتصادي همکارۍ د لا پراختیا هر اړخیزه ژمنه وکړه او څرګنده یې کړه چې په نږدې راتلونکي کې به په ګډ سوداګریز مرکز کار پیل وکړي. نوموړي زیاته کړه چې د می په میاشت کې به د اوزبیکستان د صنعت، پانګونې او سوداګرۍ وزارت وزیر او لوړپوړی پلاوی کابل ته سفر وکړي، تر څو د ګډو اقتصادي موضوعاتو په اړه د دواړو هېوادونو ترمنځ بحثونه ترسره شي.
ناسته د افغانستان له لوري د تللي پلاوي څخه د مننې او د راتلونکې لپاره د همېشنۍ همکارۍ د ډاډ په ورکولو پای ته ورسېده.
