د ترکیې د بهرنيو اقتصادي اړیکو شورا له غړیو سره لیدنه کتنه

شنبه ۲۸ جمادی الاول ۱۴۴۶ / ۱۰ لینډی ۱۴۰۳

د ا.ا.ا. د صنعت او سوداگرۍ وزارت سرپرست محترم الحاج نورالدین عزیزي، له خپل مل پلاوي سره د سوداګرۍ او سیمه ییزو همکاریو د براختیا په موخه د ترکیې جمهوریت د بهرنيو اقتصادی اړیکو شورا له محترمو غړیو سره وکتل.

پدې کتنه کې چې د ترکیې هېواد د بېلابېلو سکتورونو لکه نفت او ګازو، هوایي شرکتونو، معادنو او ټکنالوژۍ سکتورنو استازو ګډون درلود، د افغانستان او ترکیې تر مینځ د اقتصادي اړیکو د ودې او پراختیا او د دواړو هېوادو تر مینځ د سوداګرۍ د حجم د زیاتوالي په تړاو خبرې وشوې او نظرونه سره تبادله شول.

په کتنه کې د یادې شورا غړیو د افغانستان د انرژۍ، ټکنالوژۍ، نفتو او ګازو، ساختماني چارو، لوژیستیک، کانونو، او نساجۍ په سکتورنو کې د همکارۍ او پانګونې لپاره چمتو والی وښود او همدارمنګه په کابل کې د دغه شورا د دفتر له پرانیستلو سره خپله لیوالتیا څرګنده کړه.

د یادونې وړ ده چې د ترکیې جمهوریت د بهرنیو اقتصادي اړیکو شورا د دغه هېواد یوه اعتبار درلودونکې شورا ده چې د دغه هېواد د خصوصی سکتور له غړیو څخه جوړه شوې ده.